السبت، 17 أبريل 2010

عايزها بشنطة هدومها






انطلقت الزغاريد من بعد صلاة العشاء واستمرت ترن في الشارع  اسبوع بحاله ولم

لا ومنى موافى  قد تقدم لها عريس قيمة وسيما ، ومعه المال بالكوم ، فهو مريش

ولقطة .ومكنتش تحلم بيه فهى حظها فى الجمال كان على اد حاله العريس كان عايش فى

دولة خليجية بعد ما خد دبلوم صنايع واشتغل فى مصنع نسيج وكانت فرصة عمره

وعاش هناك وبعد عشرين سنة بالتمام والكمال فكر اخيرا انه ينزل مصر عشان

يتجوزابو العروسة واخواتها السبعة مترصصين فى البلكونة واخيرا ظهرت عربية

العريس الكبيرة المكيفة ابو العريس بعلو صوته 
 "محمود لهيطة وصل العريس وصل وايه فى عربية ولا من اللى بتطلع فى السيما "

يوم وصول العريس عملوا له الف حساب فالعفش كله اتلمع والارض اطوقت والنجف

اتمسح والسجاجيد اتغسلت ام العروسة "كفاية كده يا بت يا انصاف خلاص هلكنا اهى

الشقة بقيت بتشف  وترف الحق ادخل البس انا بقى "بعد ما لبست تدخل اودة منى

وتضرب صدرها بايدها وهى تشهق شهقة بصوت عالى "يا خربيتك ايه اللى انتى عامله

فى نفسك ده يا بت مبتشفويش بنات اليومين دول يعملوا ايه فى نفسهم "منى وبزهق "فى

ايه يا امه بس مالك ما انا حلوة اهو "امها وهى تعوج بؤها رايح جى "حلوة قال حلوة قال

 تعال اما ازوقك "منى بتأفف "مانا متزوقة اهو ولا عايزنى ابقى زى العروسة الحلاوة

"امها وهى تمسك صباع  الروج وتفتحه على الاخر وتمشيه على شفايفها رايح جى

"وكمان هاتى  شوية بتاع ده من اللى يحطوه "منى وهى مستسلمة "بتاع ايه ده "امها

وهى تمسك زجاجة  البنكيك "اهو ده اللى يدهنوا بيه وشهم الاصفر يبقى احمر ياختى "

وتدهن وتدلق االزجاجة  على وش منى حتى وكأنها عروسة حلاوة "اهو كده قمر ياختى

فشر ليلى علوى "منى تبص لنفسها فى المراية وهى معجبة بروحها وصدقت انها شبه

ليلى علوى "بجد ياما ليلى علوى "امها وهى فاشخة بؤها "طبعا ياختى ليلى علوى

واحلى كمان طب ليلى علوى ديه متجيش فيكى حاجة " منى وهى مكسوفة "شفتى

 العريس يامه حلو "امها ترد "حلو هو الرجل بحلاوته يا هبلة الراجل بجيبه وده جيبه

متريش بيقولك بيشتغل فى الخليج وجى عايز عروسة بشنطة هدومها  ده حتى كمان

 بيقول اخدها من غير هدوم هو بس يعنى عنده كرش كده كبير شوية ويعنى كده عينيه

جيين على بعض شوية ويا حبة عين امه شعره من الشقا وقع كله وكده يعنى الدغ ونص

لسان بس المضروب دمه شربات "منى وهى تستعد للخروج "مش مهم يامه مش مهم

حتى لو قرد مسلسل اهو اتجوز بدل ما اعنس زى البت عنايات ولا فتحية ونحمده ولا

مها وعبير وجميلة وهبة " ام منى والدموع ف عينيها "تفى من بؤك يا بت الف بعد الشر

 عليك قال تعنسى قال ليه كانت الرجالة اتعمت ولا اتحولت طيب والله ده انا نادرة صينية

فتة باللحمة للسيدة زينب يوم ما يكتب كتابك "منى باستعجال "طيب ياما لحسن العريس

يستعوئنا ويقول اننا بنتقل عليه ولا حاجة "امها وهى تضحك وفاشخة ضبها "وايه يعنى

يا بت ما نتقل على الارز لحد مايستوى ويشيط كمان "

"اللهم ما صلى  على النبى "ام العريس بعلو صوتها اول ما شافت منى العريس احول

على حولانه وهو يركز عشان يفحص العروسة وكرشه مدلدل من البنطلون منى تقدم

اكواب العصير وهى تمسك بحرص الصينية الفضية بتاعة الست  ام شحاتة جارتهم

واللى امنتهم امانة انهم يحطوهافى عينيهم وميكسروهاش عشان دى الصينية اللى دخلت

بيها من ربع قرن بعد ما اكلوا الجاتوه وشربوا العصير العريس يمسك منديل ويمسح بيها

صلعته وهو يبص للارض من كسوفه "اامرنى يا عمو ايه طلباتك "عمو وشه احمر "انا

معنديش طلبات احنا نشترى رجالة "العريس فشخ ضبه على الاخر ونفسه اتفتح اكتر

 ومسك طبق البتى فيور والتهمه التهاما ست ام محمود فتحت شنطتها  واخرجت منها

علبة قطيفة حمرة وخرجت منها عقد يبرق وترفع العقد لفوق وهى تدور بيه شمال ويمين

 الماظ حر امال ايه حودة ميشبكش الا الماظ "وتدى ابو العروسة العقد فى ايده وهىتقوله

"خد اتفرج يا حاج حاجة عمرك مشفتوها قصدى ماس من الاصلى وحياتك بنتك صبرت

 ونالت عريس ايه حسب ونسب والنبى انت طيب يا حاج ان ربنا وقعك فى ناس زينا

"ابو منى يدى العقد لام منى تتفرج عليه ام العريس تبص فى الساعة "يووه ميعاد الدوا

اللى ميتخدش الا بعد الاكل يالا يا حودة معلش يا جماعة المرة الجاية نقرى الفاتحة "ابو

 العروسة وهو يحلف يمين "عظيم بالتلاتة مانتم ماشيين الا لما ناكل لقمة سوا معلش يا

ست ام محمود اجلى بس الدوا نص ساعة " ام العريس وهى تتأتأ"بس لو مكنتش تحلف

 يا حاج "يدخل ابو منى الاودة وينده على ابنه حسن ويعطى له فلوس  ويقول له "اجرى

 يا اد  بسرعة على الحاتى اللى على اول الشارع هات لنا خمسة كيلو كباب وكفتة وسلطة وعيش وقول له اتوصى "
حسن وهو مش مصدق "حمامة يا ابه "منى وامها يجهزوا السفرة والعريس يحكى لابو

العروسة على الخليج الكباب جه وريحته جت قبله العريس وامه اكلوا وكانهم يكلوا فى

اخر زداهم وبعد ما كلوا حلوا واخيرا مشيوا نامت منى وهى تحلم بالعريس والعقد الالماظ وابو منى يقول لام منى "اااه خمسمية جنيه ولاد الحرامية كيلو الكباب بمية جنيه

فاكرة يا حاجة لما كنا نشتريه بخمسة جنيه "ام منى وهى يتضحك "متفكرنيش بالايام

الحلوة ديه "اتصلى يا بت بخطيبك صبحى عليه "منى وهى مكسوفة "لا يامه اتكسف

 "امها وهى تصرخ فيها "تكسفى يا هبلة يا بت ده جيبلك شبكة الماظ وخطيبك وحيبقى

 جوزك "عندك حق مش خسارة فيه دقيقة محمول "يوو الرقم بيقول مقفول "يمكن لسه

نايم ام منى "طيب استنى ساعة كده ولا اتنين واتصلى تانى "وطول النها ر منى تتصل

والرقم مغلق واخيرا ام منى تقولها "ااقولك يا بت هاتى انا اتصل على امه اعمل اكنى

اسأل على صحتها مش الوليه كانت تعبانة امبارح بردو "وبعد ما تتصل مرة واتنين

وتلاتة "ايه الناس ديه ايه اللى حصل لها قافلين تيلفوناتهم ليه "ام منى فكرها يودى

ويجيب وتقوم تلبس هدومها "هاتى يا منى العقد انا التعبان بيلعب فى عبى "منى وهى

مبحلقة "عبك ايه يامه بس فال الله ولا فالك "ام منى بعصبية"هاتى يا بت العقد "منى

وهى تجرى على جوا تجيب العقد وتديه لامها تنزل ام منى تروح الصاغة وتقعد ادام الجواهرجى يخرج عدسة مكبرة ويمسك العقد يفحص بيه ويدقق وبعدين يقول بنبرة اسى

"للاسف العقد بديع  الصنع بس الفصوص فالصو شوية  ازاز مشطوف "تدخل ام منى

الشقة ابو منى ومنى واخوات منى الكل حواليها مستنى يشوف الجواهرجى قال ايه ام

منى بنبرة اسى "فالصو العريس طلع فالصو "ابو منى تحصل له  ازمة ويقعد على

 الكرسى ومبيقلش غير "يا خسارة فلوسك يا خسارة الخمسمية لحلوح "



















هناك 12 تعليقًا:

  1. ههههههههههههههههههههههههههههه....
    هوا فيه ناس كده؟؟

    ههههههههههههههههههههههههههههههههههه...
    علشان اكلة كباب؟؟!!! ههههههههههه...
    جامدة ياشيري..

    ردحذف
  2. طب و الله طريقه جديده للنصب و مبتكره جدا

    يتقدم لواحده فى ميعاد الغدا و على العشا يكون راح للتانيه

    بس يا حرام صعب يتقدم لحد فى ميعاد الفطار

    يقضيها طعميه وفول بقى

    يا افكارك يا شيرى

    ههههههههههههههههههههههههههه

    ردحذف
  3. حتى لو قرد مسلسل اهو اتجوز بدل ما اعنس زى البت عنايات ولا فتحية ونحمده ولا مها وعبير وجميلة وهبة

    هههههههههههههه
    كل دول معنسين ياشيرو دي حارة العوانس ولا أيه

    يلا كل أكلة كباب ومنى وأمها وأبوها بخير

    ردحذف
  4. هو العريس كان داخل علي طمع في الكباب ولا ايه؟؟
    :D
    يلا هارد لك عشان الطمع قل ماجمع

    ردحذف
  5. نسرين

    العريس افاق ونصاب وعلى فكرة الموضوع كان حادثة قريتها من كذا شهر

    ردحذف
  6. ابو على

    الكيلو بمية جنيه

    وبعدين هم كانوا جايين فى اى حاجة جوع يابنى

    ردحذف
  7. صيدلانية

    نورتى يا جميل

    بس مفيش حد حيروح يقرا فاتحة فى السابعة صباحا

    الناس ديه عارفة هى بتظبط لايه بالظبط

    ويا تظبيطاتك يا معلم

    ردحذف
  8. بستان زهرة
    طيب ااقولك على حاجة
    والله العظيم

    احنا ساكنين فى برج مشالله فيه اكبر عدد من البنانيت االلى لسه متجوزوش والباقى مطلقات
    مش عارفة اعمل ايه نفسى اعزل من العمارة الشؤم ديه ولكن اينما عزلتم يدرككم العنس

    ردحذف
  9. اهلا بيك
    يا ترى اول زياره لفشكول وياترى اول زياره لى هنا
    العري وامه اتعشوا ببلاش وعشوه أييييه .. اسمه ايه .. اسمه ايه .. آآأآه .. كباب .. يعنى ايه الكباب ده .. يا ريتنى كنت مع الجماعه دول ما هو المشكله فى الجواز اليومين دول ان الشباب مش معاهم فلوس وعشان كدا بيفضلوا يكونوا عزاب رغما عن انفهم .. عشان ايامنا بقت زفت وهباب وطين.

    تحياتى

    ردحذف
  10. فشكول
    شرفتنى يا فندم

    ردحذف